ياصدمتي~!

صباحكم .. / .. مسائكم
ورد
:
:
:

يا صدمتي في أكثر احبابي.. ويا خيبة ظنوني
يا ضيق صدري لا ذكرت انّي عليهم ما كذبْت


يا طعنةٍ خلتني انسى من سبايبها.. طعوني
يا جرح ماله طبّ حتى لو أقول اني استطبْت


البارحه والله يكون بعون خفّاقي .. وعوني
أحاول اهرب من عمايلهم ولكنِ ما هربْت


ما كنت احسّ اني أنا أنا؟ وهذا الكون.. كوني
أمُرّ في حالة ضياع وشبه غيبوبه وكبْت


أحباب؟؟ أي أحباب ذول اللي على موتي خذوني
الظاهر اني شبْت ياعالم.. وانا بعدِ بنت وماشبْت


سألت نفسي هم يبوني صدق؟؟ ولا ّ ما يبوني؟
جاوبت نفسي وليتني على سؤالي ما أجبْت


اللي لهم مُدّه وهم في داخلي .. واستغفلوني
ياما استغلوا طيبتي معهم وكل اللي وهبْت


وهبتهم قلبي.. وشعري.. وكلما حولي ودوني
تعبْت معهم بس ما كنّي رغم هذا.. تعبْت


شعرت فعلاً بالعذاب وحرقة الدمع بعيوني
قرّبتهم منّي وانا اللي كنت احسْبنّي قربْت


عشانهم قررت ابيع اللي من العالم شروني
عشانهم بطّلت لعب.. وليتني والله لعبْت


مادامهم ما قدّروا صدقي ومعهم جرجروني
لو ادري آخرها كذا .. في ذمتي كان انسحبْت


أحبابهم واجد.. ولا ادري ليه فيهم علقوني
مع ان عمري ماجبرت انسان فيني ولا غصبْت


يا قوّها صدمه وانا لون الغدر ماهو بلوني
والله ما أنلام لو بعد الذي سوّوه ..غبْت


ماكنت ناقص صدمه ثانيه في حياتي.. واصدموني
مصدومه خِلقه .. لين مات الحب فيني وانعطبْت


الحين مدري كيف اعاملهم وهم ما قدّروني
ما استوعبوا للّي كتبت من القصيد.. وما كتبْت


الله يجازيهم على استنزاف عاطفتي وفنوني
ماكنت حاسبتهم يبيعون الغلا .. يومي حسبْت


اثْر الغلط مني لأني كنت معطيتهم جنوني
لكنّي أعلنها صريحه.. تبْت والله .. ثم تبْت


ما عاد لي رغبه أجدّد في علاقتهم طعوني
خسرت في هذا الطريق اضعاف ضعف اللي كسبْت


أحسن لي ابعد واشتري نفسي ولا خيبة ظنوني
ان طبت من جرحي والاجعلني عمري ماطبت


:
:

وصلت لذائقتي وكليٌ
آمل وصولها لذائقتكمٌ
:
: